Një ngjarje e rëndë dhe e pazakontë ka ndodhur në zonën e Neos Kosmos në Greqi, ku një përleshje mes një 49-vjeçari shqiptar dhe pronarit 45-vjeçar të një servisi makinash, me origjinë armene, ka degjeneruar në përdorimin e armëve të ftohta dhe dhunë fizike.

Dinamika e ngjarjes dhe kthimi me thikë

Sipas mediave greke, konflikti nisi fillimisht kur 49-vjeçari hyri në ambientet e biznesit, fyu pronarin dhe u përpoq ta sulmonte fizikisht. Falë ndërhyrjes së klientëve dhe personave të tjerë të pranishëm, ai u largua përkohësisht, por jo pa lënë paralajmërime se "do ta paguante me gjak".

Pak kohë më vonë, shqiptari u kthye sërish në garazh, i armatosur me një thikë me gjatësi 26 centimetra, duke bërtitur: “Do të të vras, do të të masakroj”. Përpara se situata të përfundonte në tragjedi, bashkëshortja e pronarit dhe një punonjës ndërhynë për ta neutralizuar përkohësisht autorin. Në atë momente, pronari 45-vjeçar mori një levë makine 75 centimetra të gjatë dhe e goditi në kokë e në këmbë 49-vjeçarin.

Pavarësisht goditjeve, shqiptari arriti të largohej nga vendngjarja, duke lëshuar kërcënime të tjera të forta: “Do të të vras, por nuk dua të të vras para gruas sate. Do të të gjej vetëm, do ta djeg dyqanin tënd”.

Ndërhyrja e policisë dhe arrestimet

Policia greke ka ndërhyrë menjëherë pas ngjarjes, duke bërë të mundur identifikimin dhe arrestimin e të dyja palëve të përfshira:

49-vjeçari shqiptar u arrestua për veprat penale të fyerjes, tentativës për dëmtim trupor dhe armëmbajtjes pa leje.

Pronari 45-vjeçar armen u arrestua gjithashtu nga autoritetet policore për akuzën e dëmtimit të rrezikshëm trupor për shkak të kundërpërgjigjes me levë gjatë sherrit.