Ish-ambasadori amerikan dhe ish-shefi i Misionit Verifikues të OSBE-së në Kosovë, William G. Walker, ka hyrë në diskursin politik rreth zgjedhjes së kreut të ri të shtetit, duke propozuar zyrtarisht Faton Bislimin si kandidat për postin e Presidentit të Kosovës.

Përmes një letre të hapur dërguar katër liderëve kryesorë politikë – kryetarit të LVV-së Albin Kurti, kryetarit të PDK-së Bedri Hamza, kryetarit të LDK-së Lumir Abdixhiku dhe kryetarit të AAK-së Ardian Gjini – Walker ka shprehur shqetësimin e tij për bllokadën dhe krizën politike lidhur me procesin e zgjedhjes së presidentit.

Pse e propozon Walker Faton Bislimin?

Në letrën e tij, Walker thekson se pavarësisht emrave të ndryshëm që qarkullojnë në publik, asnjëri prej tyre nuk i përmbush të gjitha kriteret e duhura sa i përket përvojës, personalitetit dhe aftësive udhëheqëse ashtu si Bislimi, të cilin ai e njeh prej vitesh.

“Nuk kam asnjë dyshim për pavarësinë e mendimit të Tonit dhe për aftësinë e tij për të shprehur qëndrimin e tij mbi çdo temë. Sipas mendimit tim, i vetmi ndër emrat e mundshëm, Toni i zotëron të gjitha aftësitë e nevojshme – si dhe personalitetin që u përshtatet atyre – për të qenë një President i suksesshëm,” shkruan ndër të tjera ish-ambasadori amerikan.

Faton Bislimi, i njohur gjerësisht si lobues i çështjes së Kosovës dhe shqiptarëve në Shtetet e Bashkuara të Amerikës, si dhe ish-deputet i Kuvendit të Kosovës, vlerësohet nga Walker si figura e duhur që do të mund të përfaqësonte shtetin në tërësi, pa u kufizuar nga agjendat partiake. Propozimi i tij vjen në një kohë kur partitë politike po zhvillojnë konsultime intensive për të arritur një konsensus për presidentin e ri të vendit.