KORÇË – Kisha e Shën Thanasit në fshatin Sinicë të Korçës është bërë pre e një akti vandalizmi nga persona ende të paidentifikuar.

Autorët kanë hyrë brenda objektit të kultit dhe kanë dëmtuar ikona dhe objekte të shenjta, ndërsa në ambientet e brendshme të kishës është hedhur edhe çimento.

Ngjarja është denoncuar nga banorët dhe dashamirësit e fshatit, të cilët prej vitesh kujdesen vullnetarisht për mirëmbajtjen e kishës, e pozicionuar rreth 1,300 metra mbi nivelin e detit.

Banorët e Sinicës e kanë dënuar aktin, duke theksuar se dëmtimi i kishës nuk prek vetëm një objekt me vlera historike dhe fetare, por edhe traditën e bashkëjetesës fetare në zonë.

Sipas tyre, Kisha e Shën Thanasit është respektuar ndër vite si nga komuniteti i krishterë, ashtu edhe nga ai mysliman. Në të kaluarën, banorët e zonës janë angazhuar së bashku për mirëmbajtjen dhe rindërtimin e objektit, pavarësisht përkatësisë fetare.

Banorët u kanë bërë thirrje autoriteteve që të zbardhin ngjarjen, të identifikojnë dhe të vënë përpara drejtësisë autorët.

Ata kërkojnë gjithashtu marrjen e masave për restaurimin e kishës dhe forcimin e mbrojtjes së këtij objekti me vlera historike, kulturore dhe fetare.