Brazili është hequr nga lista e vendeve të autorizuara nga Bashkimi Evropian për eksportin e disa kategorive të kafshëve dhe produkteve me origjinë shtazore për konsum njerëzor, përfshirë mishin e shpendëve dhe të gjedhit.

Në këtë kuadër, Autoriteti Kombëtar i Ushqimit (AKU) ka sqaruar rregullat që do të zbatohen për ngarkesat me origjinë braziliane që mbërrijnë në Shqipëri pas datës 3 shtator 2026.

Sipas AKU-së, ngarkesat me mish shpendësh dhe gjedhi për të cilat certifikata zyrtare shëndetësore veterinare është nënshkruar ose lëshuar përpara 3 shtatorit 2026, do të vijojnë të pranohen edhe nëse mbërrijnë në territorin shqiptar pas kësaj date.

Ky sqarim bazohet në interpretimin e dhënë nga përfaqësues të Komisionit Evropian gjatë një takimi të zhvilluar më 28 maj 2026 në Bruksel, ku u përcaktua se ndryshimet e reja nuk do të zbatohen në mënyrë retroaktive për eksportet e kryera përpara hyrjes në fuqi të masave.

Ndryshimi lidhet me Rregulloren Zbatuese të Komisionit (BE) 2026/1189, e cila ndryshon Rregulloren (BE) 2021/405.

AKU thekson se importi i mishit nga Brazili në Shqipëri kushtëzohet gjithashtu nga legjislacioni kombëtar dhe nga miratimi i zonave dhe stabilimenteve prodhuese nga Bashkimi Evropian.

Autoriteti Kombëtar i Ushqimit deklaron se do të vijojë kontrollet dhe monitorimin e ngarkesave në pikat kufitare, me qëllim garantimin e sigurisë ushqimore dhe mbrojtjen e shëndetit publik.