Një operacion i ndërmarrë nga efektivët e Komisariatit të Policisë Pukë ka çuar në zbardhjen e një rasti të kultivimit të bimëve narkotike dhe në arrestimin e dy personave në flagrancë. Ngjarja është regjistruar në fshatin Berishë të Fushë Arrëzit, ku uniformat blu kanë vënë në pranga dy shtetas, konkretisht babë e bir.

Sipas njoftimit zyrtar të policisë, në kuadër të megaoperacionit kombëtar kundër lëndëve narkotike të koduar “Territor i Pastër”, pas kontrolleve intensive në terren dhe informacioneve të siguruara në rrugë operative, u konstatua një parcelë me bimë të dyshuara Cannabis Sativa.

Në pranga ranë shtetasit T. M., 59 vjeç, dhe djali i tij Y. M., 24 vjeç, banues në fshatin Berishë. Bimët narkotike, në numër prej 172 rrënjësh, ishin kultivuar në afërsi të banesës së tyre.

Gjatë ndërhyrjes, shërbimet e Policisë bënë të mundur asgjësimin e pjesës më të madhe të bimëve nëpërmjet djegies, ndërsa një pjesë e tyre u sekuestrua në cilësinë e provës materiale. Materialet procedurale i kanë kaluar për veprime të mëtejshme Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprën penale të kultivimit të bimëve narkotike.