Deputeti i Partisë Socialiste, Erion Braçe, ka riafirmuar hapur ambicien e tij për të garuar për Bashkinë e Tiranës në zgjedhjet vendore të vitit 2027. Përmes një videoje të publikuar nga lagjja e Kombinatit në rrjetet sociale, ai ka përcjellë një mesazh të qartë kritik ndaj mënyrës tradicionale të përzgjedhjes së kandidatëve nga kupola e partisë, duke kërkuar një proces më gjithëpërfshirës dhe demokratik për bazën socialiste.

Kritika ndaj metodës së vendimmarrjes dhe paralajmërimi për garë

Braçe ka sjellë në vëmendje faktin se në terren tashmë po qarkullojnë emra të ndryshëm të nxitur nga lart për të nisur punën, duke u thënë se u është dhënë “fisto” për të qenë kandidatë. Megjithatë, deputeti socialist ka theksuar se ai vetë nuk ka pritur ndonjë sinjal apo bekim nga strukturat për të nisur terrenin, por ka preferuar të jetë pranë qytetarëve, duke identifikuar nga afër problematikat e kryeqytetit.

Sipas tij, koha e vendimeve të ngushta dhe e “njoftimeve në mur” ka marrë fund. Braçe thekson se socialistët dhe qytetarët e Tiranës nuk duan të përballen me një emër të vendosur paraprakisht për ta votuar si një produkt të gatshëm, por kërkojnë të jenë pjesë aktive e vendimmarrjes dhe e zgjedhjes së kandidatit të tyre.

Puna në terren dhe vizioni për kryeqytetin

Duke konfirmuar se do t’i shkojë deri në fund kësaj gare, Braçe shprehet se po e kupton qytetin rrugicë më rrugicë, me qëllim që të kontribuojë në rikthimin e Tiranës në një hapësirë plotësisht të jetueshme, të pastër, të gjelbër dhe me shërbime cilësore për të gjithë banorët. Ky qëndrim i radhës shton dinamikat e brendshme brenda Partisë Socialiste lidhur me primaret dhe garën për drejtimin e bashkisë më të rëndësishme në vend në prag të zgjedhjeve të vitit 2027.

Postimi i plotë i Braçes:

Nga mesi i Kombinatit:

Unë nuk besoj se socialistët duan një njoftim, por duan të vendosin.

Unë nuk besoj se socialistët duan të votojnë një njoftim, por duan të zgjedhin kandidatin e tyre për Bashkinë e Tiranës!

Më kanë shkruar plot njerëz të mirë nga territori këto ditë.

I kanë thënë dikujt: “Ti do të jesh, fillo puno”, dhe ai ka nisur punën fort. I kanë konfirmuar dikujt tjetër: “Ty të kam, merru me njerëzit”, duke e lënë të kuptohet se “mund të jesh ti”.

Shikoni, kjo është shumë mirë. Ka gjallëri, edhe pse e padukshme, edhe pse “nuk është momenti”.

Mua më pëlqen të ketë garë, punë konkrete në territor, diskutime për zgjidhje.

Jam edhe unë një nga të gjithë dhe nuk prita të më thotë dikush: “Do të jesh ti, puno tani”. Jo. Ndjeva njerëzit në rrugët dhe lagjet e Tiranës, pashë çfarë nuk ecën dhe krijon probleme. Po kuptoj qytetin dhe nevojat e tij rrugicë më rrugicë. Po flas me shumë njerëz për atë që duhet të ndryshojë rrënjësisht në këtë qytet, për ta rikthyer që të bëhet sërish i jetueshëm.

Po pres garën dhe do t’i shkoj deri në fund, si gjithmonë, për ta fituar këtë punë, sepse punë është

Nuk pres një njoftim në mur apo në eter. Nuk vlen njoftimi, është i vjetër. Kriza që po jetojmë ka në thelb mënyrën se si vendosim, dhe njoftimi, përjashtues në përgjithësi, nuk është më element i vendimmarrjes.

Socialistët, para së gjithash, por edhe njerëzit më gjerë – sidomos në këtë qytet – duan të jenë pjesë e vendimmarrjes, jo të marrin dhe të votojnë njoftime si produkt i një vendimmarrjeje që po bëhet gjithnjë e më e ngushtë dhe që nuk i përfshin.

Kjo duhet të ndryshojë dhe Tirana e meriton!