Një situatë e rënduar trafiku është krijuar përgjatë Rrugës së Kombit, ku drejtuesit e mjeteve po përballen me pritje që zgjasin nga 40 minuta deri në një orë. Radhët e gjata dhe kilometrike janë shënuar kryesisht pranë mbikalimit të Rrëshenit, zonë në të cilën infrastruktura rrugore pëson ngushtim nga katër në dy korsi.

Vonesat e theksuara në qarkullim kushtëzohen nga vetë profili teknik i aksit, ku segmenti nga Rrësheni deri në Milot operon me dy korsi lëvizjeje me kahe të kundërta, ndërsa pjesa tjetër e Rrugës së Kombit, deri në pikën kufitare të Morinës, është e ndërtuar me katër korsi. Fluksi i lartë i automjeteve drejt Tiranës lidhet ngushtësisht me përfundimin e pushimeve dhe largimin e diasporës nga vendet e rajonit drejt shteteve të Europës perëndimore ku jetojnë dhe punojnë. Ndërkohë, në këtë nyje kyçe të trafikut është konstatuar mungesa e patrullave të Policisë Rrugore për të ndërhyrë në menaxhimin dhe lehtësimin e qarkullimit.