Gjatë 24 orëve të fundit, territori i vendit është përfshirë nga 31 vatra zjarri, nga të cilat 3 mbeten aktive dhe 6 të tjera janë nën mbikëqyrje. Për menaxhimin e situatës janë angazhuar mbi 370 forca operacionale dhe 22 automjete zjarrfikëse, ndërsa Forcat e Armatosura kanë ndërhyrë me 70 efektivë, mjete të rënda dhe 3 helikopterë.

Tre vatrat kryesore që vijojnë të jenë aktive ndodhen në Malin e Dajtit, në Ballenjë të Dibrës dhe në Qafën e Helmës në Bulqizë. Autoritetet konfirmojnë se terreni është i vështirë dhe shkëmbor, por deri më tani nuk ka rrezik për zonat e banuara. Ndërkohë, situata paraqitet e përmirësuar në qarkun e Pukës, ku vatrat në Tërbun, Gojan dhe Gjegjan janë shuar plotësisht pas ndërhyrjeve intensive nga ajri dhe toka. Agjencia Kombëtare e Mbrojtjes Civile mbetet në gatishmëri të plotë për të garantuar mbrojtjen e jetës dhe pronës së qytetarëve.