LUSHNJË – Është kapur nga Policia Florion Dalladaku, 45 vjeç, i dyshuar për ngjarjen e rëndë të ndodhur mbrëmjen e së hënës në fshatin Zhymë të Lushnjës.

Dalladaku ishte shpallur në kërkim pasi dyshohet se, brenda banesës së familjes, sulmoi me sqepar nënën e tij, Fanije Dalladaku, 80 vjeçe, e cila humbi jetën si pasojë e plagëve të marra.

Gjatë ngjarjes mbeti i plagosur rëndë edhe babai i tij, Hasan Dalladaku, 77 vjeç, i cili ndodhet në spital nën kujdesin e mjekëve.

Pas krimit, 45-vjeçari ishte larguar me një automjet tip Ford, ndërsa Policia kishte ngritur postblloqe dhe kishte nisur kontrollet për lokalizimin e tij.

Sipas informacionit paraprak të Policisë, Dalladaku dyshohet se ka probleme të shëndetit mendor. Tashmë, pas kapjes së tij, grupi hetimor dhe Prokuroria vijojnë punën për zbardhjen e plotë të rrethanave dhe motiveve të ngjarjes.

Njoftimi i Policisë:

Lushnjë/ Kapet një orë pas ngjarjes autori i dyshuar i vrasjes së nënës dhe i plagosjes së babait.

Autori i dyshuar u kap duke drejtuar automjetin e vëllait, në tentativë për të dalë nga qarku Fier.

Në vijim të informacionit paraprak të dhënë për ngjarjen e ndodhur në fshatin Zhymë, Lushnjë, ju informojmë se:

Menjëherë pas ngjarjes, forca të shumta të Policisë rrethuan zonën, ngritën pika kontrolli dhe u vunë në ndjekje të autorit, i cili paraqiste rrezikshmëri edhe për banorët e tjerë.

Si rezultat i reagimit të menjëhershëm dhe angazhimit të shërbimeve të Policisë së Drejtorisë Vendore të Policisë Fier dhe Komisariatit të Policisë Lushnjë, u bë i mundur lokalizimi i autorit të dyshuar, pranë Spitalit Memorial, Fier, dhe vënia në pranga e tij, rreth një orë pas ngjarjes.

Shtetasi F. D., 45 vjeç, është shoqëruar në ambientet e Drejtorisë Vendore të Policisë Fier, së bashku me automjetin që drejtonte, ku po kryhen veprimet procedurale.

Grupi hetimor vijon punën për dokumentimin e plotë të ngjarjes dhe sqarimin e rrethanave të saj.