Topi me të cilin Diego Maradona shënoi golin e famshëm të “Dorës së Zotit” në Kupën e Botës 1986 është shitur në ankand për 3.3 milionë dollarë.

Ngjarja ikonike ndodhi në çerekfinalen mes Argjentinës dhe Anglisë, më 22 qershor 1986, kur Maradona e devijoi topin me dorë mbi portierin anglez Peter Shilton. Argjentina fitoi ndeshjen 2-1 dhe vazhdoi rrugëtimin drejt titullit botëror.

Pas takimit, Maradona e përshkroi golin me frazën e famshme se ishte shënuar “pak me kokën e Maradonës dhe pak me dorën e Zotit”.

Topi, një Adidas Azteca, u ruajt për më shumë se tri dekada nga arbitri tunizian i ndeshjes, Ali Bin Nasser. Ai ka deklaruar se bëhet fjalë për topin e përdorur gjatë asaj ndeshjeje historike.

Bin Nasser e kishte shitur topin fillimisht në vitin 2022 për 2.3 milionë dollarë. Një vit më vonë, pronari i ri tentoi ta nxirrte sërish në ankand, por shitja nuk u realizua pasi ofertat nuk arritën çmimin minimal të përcaktuar.

Objekti sportiv është veçanërisht i kërkuar nga koleksionistët për lidhjen e drejtpërdrejtë me një prej momenteve më të famshme dhe më të debatueshme në historinë e Kupës së Botës.

Fanella e Maradonës u shit për 9.7 milionë dollarë

Topi nuk është i vetmi objekt nga ajo ndeshje që ka arritur një vlerë të jashtëzakonshme në ankand.

Fanella që Maradona veshi gjatë përballjes kundër Anglisë u shit në vitin 2022 për 9.7 milionë dollarë, duke u kthyer në një prej fanellave sportive më të shtrenjta të shitura ndonjëherë.