Dy mundës shqiptarë nga Shkupi, Rexhep Hajdari dhe Fati Vejseli, kanë fituar medalje të argjendta për Maqedoninë e Veriut në Lojërat Mesdhetare “Taranto 2026”.

Të dy sportistët arritën deri në finalet e kategorive përkatëse, pas paraqitjeve të suksesshme gjatë turneut, por në fund u renditën në vendin e dytë.

Hajdari, medalje argjendi në 97 kg

Rexhep Hajdari garoi në kategorinë deri në 97 kilogramë, në stilin e lirë.

Në finale, mundësi shqiptar nga Shkupi u përball me grekun Dauren Kurugliev, i cili triumfoi me rezultatin 6-0.

Hajdari kishte regjistruar dy fitore gjatë rrugëtimit drejt finales, duke i siguruar Maqedonisë së Veriut medaljen e parë të argjendtë në këtë disiplinë.

Vejseli ndalet në finale pas dëmtimit

Medaljen e dytë të argjendtë për Maqedoninë e Veriut e fitoi Fati Vejseli, në kategorinë deri në 74 kilogramë.

Vejseli u përball në finale me mundësin e Shqipërisë, Islam Dudaev. Përballja u ndërpre pas një dëmtimi të sportistit shqiptar nga Shkupi. Në momentin e ndërprerjes, Dudaev ishte në epërsi.

Vejseli kishte zhvilluar një turne të suksesshëm deri në finale, duke regjistruar tri fitore.

Me dy medaljet e argjendta të Hajdarit dhe Vejselit, Maqedonia e Veriut numëron tashmë tri medalje në “Taranto 2026”: dy të argjendta dhe një të bronztë, të fituar nga Ahmad Magomedov, gjithashtu në mundje.