POGRADEC – Pas rreth nëntë orësh diskutime, ka përfunduar mbledhja e Kryeministrit Edi Rama me kabinetin qeveritar në Pogradec.

Takimi i sotëm pasoi mbledhjen e një dite më parë me drejtuesit politikë të Partisë Socialiste dhe u përqendrua te bilanci i punës së ministrive, si dhe te prioritetet që do të shoqërojnë vijimin e mandatit qeverisës.

Një nga çështjet kryesore të diskutimit ishte modernizimi i shërbimeve publike dhe mënyra e trajtimit të kërkesave të qytetarëve.

Në fokus ishte edhe platforma e re “Pasqyrë Albania”, e konceptuar si një riformatim i mekanizmit të “Bashkëqeverisjes”. Sipas të dhënave të bëra publike, platforma do të funksionojë përmes dy seksioneve kryesore dhe synon që kërkesat dhe problematikat e qytetarëve të ndiqen në kohë reale.

Qeveria synon që përmes këtij mekanizmi të forcojë llogaridhënien e institucioneve publike dhe të monitorojë respektimin e afateve për trajtimin e kërkesave.

Mbledhja e zhvilluar me dyer të mbyllura pritet të shërbejë gjithashtu si një pikë orientimi për përgatitjet e mëtejshme politike dhe institucionale, përpara mbledhjes së Asamblesë Kombëtare të Partisë Socialiste, e cila pritet të zhvillohet në fillim të shtatorit.