Italia pritet të ashpërsojë rregullat e qarkullimit për këmbësorët që përdorin celularin gjatë kalimit të rrugës. Sipas draftit të Kodit të ri Rrugor, përdorimi i telefonit apo i pajisjeve të tjera elektronike që shpërqendrojnë vëmendjen gjatë kalimit do të konsiderohet shkelje dhe do të dënohet me gjobë nga 75 euro.

Masat e reja pritet të përfshijnë edhe përdorimin e tabletëve, laptopëve dhe kamerave gjatë kalimit të rrugës. Ndërkohë, përdorimi i pajisjeve për biseda telefonike pa duar do të lejohet, ndërsa përdorimi i telefonit në raste emergjence do të përbëjë përjashtim.

Kufizimet nuk do të zbatohen për këmbësorët që përdorin celularin ndërsa ecin në trotuar. Rregullat e propozuara synojnë të rrisin vëmendjen e këmbësorëve dhe të reduktojnë rrezikun e aksidenteve të shkaktuara nga shpërqendrimi.

Drafti parashikon gjithashtu detyrime të tjera për këmbësorët. Para se të kalojnë rrugën, ata duhet të sigurohen se drejtuesi i automjetit i ka parë dhe ka ndërmend të ndalojë. Gjatë kalimit, këmbësorët nuk duhet të vonohen pa arsye.

Kodi i ri Rrugor pritet të miratohet deri në mesin e tetorit. Ndryshimet synojnë forcimin e sigurisë rrugore dhe uljen e aksidenteve të lidhura me përdorimin e pajisjeve elektronike dhe shpërqendrimin gjatë lëvizjes.