TIRANË — Kryetari i Partisë Demokratike, Sali Berisha, ka deklaruar në një dalje për mediat se çdo lëvizje apo ndryshim i mundshëm në qeveri gjatë vjeshtës nuk do të mund t’i mashtrojë më qytetarët shqiptarë.

Duke komentuar zhvillimet politike, Berisha theksoi se e vetmja zgjidhje për krizën aktuale është largimi dhe dorëheqja e menjëhershme e kryeministrit Edi Rama, të cilin e konsideron përgjegjës kryesor.

“Qytetarët kanë gati 90 ditë që protestojnë, ndërsa PD kërkon prej vitesh largimin e tij. Asnjë ndryshim në qeverinë e ashtuquajtur ‘Balluku BIS’ nuk mund të fshehë dështimet e këtij pushteti. Zgjidhja e vetme e kësaj krize të frikshme është dorëheqja e Ramës,” u shpreh kreu i opozitës.

Këto deklarata vijnë në prag të rikthimit të aktiviteteve politike dhe parlamentare pas periudhës së verës, ndërsa opozita vijon kërkesat e saj për ndryshim të drejtimit të qeverisë.