DUKAGJIN — Një ngjarje e rëndë ka tronditur zonën e Dukagjinit, ku dy persona kanë mbetur të vrarë dhe një tjetër është plagosur rëndë pasi automjeti me të cilin udhëtonin është bërë shënjestër e një breshërie plumbash.

Viktimat janë identifikuar si Prelë Gjoni, 82 vjeç, dhe djali i tij, Lekë Gjoni, 57 vjeç. Në të njëjtin mjet ndodhej edhe Lazër Bashi, i cili mbeti i plagosur dhe, pas trajtimit fillestar në spitalin e Shkodrës, u transportua drejt Tiranës për ndihmë të specializuar, ku aktualisht ndodhet jashtë rrezikut për jetën.

Sipas të dhënave paraprake, atentati u krye rreth orës 16:00 në rrugën e fshatit Xhan, ndërsa viktimat po ktheheshin drejt Shkodrës. Dy persona të armatosur dyshohet se kanë qëlluar në drejtim të mjetit me kallashnikov dhe armë të llojit MP5, duke lënë pas mbi 50 gëzhoja në skenën e krimit.

Terreni i thepisur malor, mungesa e kamerave të sigurisë dhe sinjali i dobët i telefonisë vështirësuan ndërhyrjen e shpejtë të forcave të rendit dhe RENEA-s, të cilët mbërritën në vendngjarje disa orë pas njoftimit.

Grupi hetimor, nën drejtimin e Prokurorisë, po verifikon disa pista, duke përfshirë jetën personale dhe aktivitetin profesional të viktimave, ndërsa vijojnë kërkimet intensive për identifikimin dhe kapjen e autorëve.