MALISHEVË — Një ngjarje e rëndë ka tronditur fshatin Kërvasari të Malishevës mbrëmjen e së dielës, ku një grua shtatzënë në javën e 34-t ka humbur jetën dhe bashkëshorti i saj ka mbetur i plagosur rëndë si pasojë e të shtëneve me armë zjarri.

Policia e Kosovës njoftoi se rreth orës 23:20, efektivët mbërritën në vendngjarje pas një njoftimi për një incident me armë dhe gjetën çiftin e bashkëshortëve të plagosur në dhomën e tyre të gjumit. Të dy u transportuan me urgjencë drejt Qendrës Klinike Universitare të Kosovës (QKUK). Përkundër ndërhyrjes intensive të ekipeve mjekësore, gruaja nuk ka mundur t’u mbijetojë plagëve dhe ka ndërruar jetë rreth orës 01:10, ndërsa bashkëshorti i saj ndodhet në gjendje kritike për jetën, i intubuar në kujdesin intensiv.

Në vendin e ngjarjes, grupi hetimor ka sekuestruar një armë zjarri që dyshohet se është përdorur në incident. Autoritetet kompetente po vijojnë hetimet intensive nën drejtimin e Prokurorisë për të zbardhur plotësisht rrethanat, dinamikën dhe motivet e kësaj tragjedie familjare.