Presidenti ukrainas Volodymyr Zelensky deklaroi se Ukraina, Shtetet e Bashkuara dhe partnerët europianë kanë përfunduar hartimin e një plani për t’i dhënë fund luftës në Ukrainë. Sipas tij, propozimi përfshin një armëpushim, krijimin e një zone të lirë ekonomike dhe tërheqjen e trupave nga zonat e konfliktit.

Zelensky tha se plani është rezultat i diskutimeve mes Ukrainës, SHBA-së, vendeve europiane dhe Rusisë, ndërsa theksoi se disa prej ideve janë ende në fazën e diskutimit.

Sipas presidentit ukrainas, një nga pikat kryesore të planit është vendosja e një armëpushimi, ndërsa një tjetër lidhet me propozimin amerikan për krijimin e një zone të lirë ekonomike.

Zelensky shpjegoi se ideja parashikon që Ukraina dhe Rusia të ndërmarrin hapa për tërheqjen e forcave, duke krijuar një zonë tampon. Sipas tij, kjo zonë do të mund të administrohej nga një palë e tretë, megjithëse ende nuk është përcaktuar se cila do të ishte kjo palë.

Diskutimet me SHBA-në

Presidenti ukrainas tha se ka zhvilluar diskutime me të dërguarit amerikanë Jared Kushner dhe Steve Witkoff, me fokus te mundësitë konkrete për përfundimin e luftës.

“Këto janë ide të përbashkëta nga amerikanët dhe evropianët dhe janë rezultat i diskutimeve të përfunduara midis amerikanëve, nesh dhe rusëve”, deklaroi Zelensky.

Ai shtoi se SHBA-ja dëshiron të vijojë bisedimet me Ukrainën dhe Rusinë dhe se pala amerikane ka edhe propozime të tjera që pritet të paraqiten në një moment të përshtatshëm.

Sipas Zelenskyt, çështja e rolit të Bashkimit Europian dhe NATO-s, si dhe angazhimet që Ukraina do të ishte e gatshme të ndërmarrë, mbeten pjesë e diskutimeve.

Presidenti ukrainas e cilësoi planin si një ide që, në këtë fazë, ka elementë realistë për t’i dhënë fund konfliktit, por theksoi se disa prej çështjeve kryesore ende nuk janë përfundimtare.