IRAN- Përplasja retorike mes Iranit dhe Presidentit amerikan Donald Trump është ashpërsuar, pasi një llogari zyrtare iraniane në rrjetet sociale publikoi një hartë të Shteteve të Bashkuara ku Kalifornia paraqitej si “territori i ri i Republikës Islamike të Iranit”.

Postimi erdhi si kundërpërgjigje ndaj një imazhi të shpërndarë nga Trump në platformën Truth Social, ku Ngushtica e Hormuzit paraqitej si “Territori i ri i SHBA-së”. Trump ka bërë më herët deklarata se rruga ujore strategjike mund të bëhej territor amerikan pas përfundimit të luftës.

Më pas, Shtëpia e Bardhë e rishpërndau postimin e Trumpit në llogarinë zyrtare në X.

Në kundërpërgjigjen iraniane, Kalifornia ishte e theksuar me ngjyrë blu, ndërsa mbi hartë shkruhej: “TERRITORI I RI I REPUBLIKËS ISLAMIKE TË IRANIT”.

Edhe zëvendësministri i Jashtëm iranian, Kazem Gharibabadi, reagoi ndaj deklaratës së Trumpit, duke e cilësuar atë si një “iluzion” dhe duke paralajmëruar se Teherani do t’i kundërpërgjigjet.

Kalifornia nuk është zgjedhur rastësisht si objekt i këtij reagimi simbolik. Zona e Los Angelesit ka një nga përqendrimet më të mëdha të komunitetit iraniano-amerikan jashtë Iranit, me rreth 141 mijë persona me origjinë iraniane në qarkun e Los Angelesit, sipas të dhënave të cituara nga UCLA.

Postimet e dy palëve duket se përfaqësojnë luftë propagandistike dhe retorike, ndërsa tensionet mes Uashingtonit dhe Teheranit mbeten të larta.