TIRANË – Kryetari i Partisë Demokratike, Sali Berisha, ka reaguar ndaj nismës së kryeministrit Edi Rama për krijimin e portalit “Pasqyra Albania”, të prezantuar pas mbledhjes së zhvilluar në Pogradec me drejtuesit politikë dhe kabinetin qeveritar.

Rama e ka paraqitur platformën si një mekanizëm të ri për komunikimin mes qytetarëve dhe institucioneve, ku çdo kërkesë apo ankesë do të mund të ndiqet në kohë reale, ngjashëm me gjurmimin e një “pakete postare”.

Berisha e ka kundërshtuar nismën, duke e cilësuar si “një tjetër projekt shumë milionësh” dhe duke akuzuar qeverinë se përmes saj do të shpërdorohen paratë publike.

Sipas kreut të PD-së, “Pasqyra Albania” nuk do të përmirësojë marrëdhënien e qytetarëve me administratën, por do të krijojë një tjetër barrierë mes tyre.

“Pasqyra është një mashtrim i ri, një mur i ri midis qytetarit dhe administratës”, deklaroi Berisha.

Ai e krahasoi projektin me “Diellën”, duke e quajtur “Diella e re shumë milionëshe” dhe duke pretenduar se platforma do t’u shërbejë qytetarëve aq sa, sipas tij, Diella luftës kundër korrupsionit dhe abuzimeve qeveritare.

Berisha e ka lidhur gjithashtu nismën me projektet dhe premtimet e tjera të qeverisë, duke e akuzuar Ramën për shpërdorim të fondeve publike. Megjithatë, në reagimin e publikuar nuk paraqiten të dhëna konkrete për koston e “Pasqyra Albania”.

Reagimi i plotë:

“Pasqyrë Albania”, Diella e re shumë milionëshe! Në serialin e mashtrimeve të tij të kësaj vere, Edi Rama, i bronzuar por i tromaksur dhe i skaduar, pas dështimit me Besën dhe Besimin, njoftoi nga Pogradeci portalin e ri "Pasqyra Albania" si mjetin e komunikimit me qytetarët për hallet e tyre. Në fakt, me këtë ai njoftoi vjedhjen e re të miliona dollarëve për "Pasqyra Albania", në të cilën, sipas tij, qytetari do të mund të ndjekë ankesën apo kërkesën e tij. Natyrisht, pasqyra është një mashtrim i ri, një mur i ri midis qytetarit dhe administratës, e cila do t’u shërbejë qytetarëve aq sa Diella luftës kundër vjedhjeve qeveritare.