PRISHTINË – Partia Demokratike e Kosovës (PDK) ka kërkuar sërish vazhdimin e seancës konstituive të Kuvendit të Kosovës, duke i dërguar një kërkesë kryesuesit të seancës sipas moshës, Avni Dehari.

PDK ka bërë të ditur se grupi i saj parlamentar do të jetë të hënën, në orën 11:00, në sallën e Kuvendit, në pritje të vazhdimit të seancës dhe konstituimit të Kuvendit.

Në letrën drejtuar Deharit, PDK kërkon që seanca të thirret në përputhje me Kushtetutën, aktgjykimet e Gjykatës Kushtetuese dhe Rregulloren e Kuvendit.

Kërkesa vjen pas seancës së fundit, ku kryetari i Lëvizjes Vetëvendosje, Albin Kurti, kërkoi kohë për të propozuar kandidatin për kryetar të Kuvendit.

PDK e ka kundërshtuar këtë qasje, duke e konsideruar si cenim të rendit kushtetues nga partia që drejton Kosovën. Partia kërkon që procesi i konstituimit të Kuvendit të vijojë pa vonesa.