POGRADEC – Kryeministri Edi Rama ka publikuar pamje dhe detaje nga mbledhja e zhvilluar sot në Pogradec me drejtuesit politikë të qarqeve dhe përfaqësues të kabinetit qeveritar. Takimi zgjati rreth 6 orë dhe u përqendrua te mënyra e re e komunikimit të qeverisë me qytetarët.

Rama tha se një nga temat kryesore ishte dokumenti “Besa”, ndërsa theksi u vendos edhe te krijimi i një mekanizmi të ri që ai e quan “Pasqyrë Albania”.

Sipas kryeministrit, përmes kësaj pasqyre qytetari do të ketë një pikë ku mund të shohë dhe ndjekë marrëdhënien e tij me institucionet shtetërore.

“Çdo kërkesë, çdo shqetësim, çdo hall i qytetarit drejtuar institucioneve të jetë si një pako postale, statusi i së cilës ndiqet në kohë reale nga dërguesi”, tha Rama.

Ai shpjegoi se sistemi synon të bëjë të gjurmueshme edhe përgjegjësitë e institucioneve, duke evidentuar rastet kur nuk respektohen afatet.

Rama e cilësoi këtë si pjesë të “ekosistemit të ri të komunikimit të qeverisë”, duke theksuar se qëllimi nuk është vetëm komunikimi publik, por një marrëdhënie më e drejtpërdrejtë mes qytetarit dhe administratës.

Mbledhja në Pogradec u zhvillua në një kohë kur qeveria përballet me protesta të vazhdueshme qytetare, ndërsa Rama e ka vendosur përmirësimin e komunikimit dhe të shërbimeve ndaj qytetarëve në qendër të diskutimeve për sezonin e ri politik.