KRUJË – Një incident me armë zjarri është raportuar në zonën e përfshirë nga zjarri në Krujë, teksa ekipet zjarrfikëse po vijojnë operacionin për shuarjen e flakëve.

Sipas informacioneve paraprake, një person ende i paidentifikuar ka qëlluar dy herë me armë zjarri në zonën ku po punonin zjarrfikësit. Dyshohet se të shtënat janë kryer në ajër dhe mund të kenë pasur si qëllim paralajmërimin e forcave zjarrfikëse për t’u larguar nga terreni.

Pas incidentit, personi është larguar nga vendi i ngjarjes, ndërsa zjarrfikësit kanë njoftuar Policinë e Shtetit.

Uniformat blu kanë nisur verifikimet për identifikimin e autorit dhe zbardhjen e rrethanave të ngjarjes, ndërsa po hetohet edhe motivi i të shtënave.

Pavarësisht incidentit, operacioni për shuarjen e zjarrit vijon në terren. Ekipet zjarrfikëse po punojnë për izolimin e vatrave dhe parandalimin e përhapjes së flakëve, ndërsa autoritetet po monitorojnë situatën në zonë.