Një gjykatëse federale rrëzoi politikën që kishte pezulluar vizat imigruese për shtetasit e 75 vendeve. Vendimi prek drejtpërdrejt edhe aplikantët nga Shqipëria dhe Kosova

Një gjykatë federale në Shtetet e Bashkuara ka rrëzuar politikën e administratës së Presidentit Donald Trump që kishte pezulluar lëshimin e vizave imigruese për shtetasit e 75 vendeve, mes tyre Shqipëria dhe Kosova.

Gjykatësja federale Jeannette A. Vargas, e Gjykatës së Qarkut Jugor të Nju Jorkut, vendosi se masa ishte në kundërshtim me ligjin dhe tejkalonte kompetencat që legjislacioni amerikan i jep Sekretarit të Shtetit, citon noa.al një raport të Reuters.

Politika ishte shpallur nga Departamenti Amerikan i Shtetit në janar dhe kishte hyrë në fuqi më 21 janar 2026. Ajo parashikonte pezullimin e lëshimit të vizave imigruese për shtetasit e 75 vendeve, të cilat administrata i kishte klasifikuar si me rrezik të lartë që emigrantët e tyre të bëheshin të varur nga ndihmat publike amerikane.

Në listën zyrtare përfshiheshin si Shqipëria, ashtu edhe Kosova, së bashku me vende të tjera nga Europa, Afrika, Azia, Lindja e Mesme, Karaibet dhe Amerika Latine, siç citon noa.al Travel.state.gov.

Gjykatësja Vargas arsyetoi se ligji amerikan nuk lejon që një aplikant për vizë imigruese të refuzohet thjesht për shkak të kombësisë së tij. Në rastet kur autoritetet duhet të vlerësojnë nëse një person mund të shndërrohet në të ashtuquajturën “barrë publike”, vendimi duhet të merret individualisht nga zyrtari konsullor.

Në këtë vlerësim duhet të merren në konsideratë rrethanat konkrete të aplikantit, përfshirë gjendjen financiare, moshën, shëndetin, aftësitë dhe situatën familjare.

Sipas gjykatës, politika e Departamentit të Shtetit e zëvendësonte këtë shqyrtim individual me një ndalim të përgjithshëm të bazuar te shtetësia e aplikantit.

Vargas e cilësoi politikën si në kundërshtim me ligjin dhe përtej autoritetit ligjor të Sekretarit të Shtetit Marco Rubio. Vendimi anulon gjithashtu refuzimet që ishin bërë vetëm mbi bazën e kësaj politike dhe kërkon që këto raste të shqyrtohen përsëri nga zyrtarët konsullorë sipas rregullave normale të emigracionit.

Masa e administratës Trump ishte justifikuar me synimin për të parandaluar hyrjen në SHBA të personave që mund të bëheshin kryesisht të varur nga asistenca financiare publike. Departamenti i Shtetit kishte deklaruar se po rishikonte politikat e kontrollit dhe verifikimit për emigrantët nga vendet që konsideroheshin me rrezik më të lartë për përdorimin e përfitimeve sociale.

Vendimi i gjykatës është veçanërisht i rëndësishëm edhe për aplikantët shqiptarë dhe kosovarë që synojnë të emigrojnë ligjërisht në Shtetet e Bashkuara.

Pezullimi në fjalë lidhej me vizat imigruese, pra ato që çojnë drejt qëndrimit të përhershëm në SHBA, dhe jo në mënyrë të përgjithshme me vizat joimigruese, si ato turistike.

Vendimi u dha të premten, më 21 gusht 2026. Administrata amerikane ka mundësi të kërkojë rishikimin e tij në një gjykatë më të lartë. /noa.al