TIRANË – Shqipëria po përjeton një rritje të ndjeshme të motorizimit, por zgjerimi i flotës së automjeteve nuk është shoqëruar ende me rinovim të mjaftueshëm të saj. Sipas të dhënave të Bankës Botërore, motorizimi në vend është rritur me 122% gjatë dekadës së fundit, ritmi më i lartë në Ballkanin Perëndimor.

Të dhënat e Drejtorisë së Përgjithshme të Shërbimeve të Transportit Rrugor tregojnë se në Shqipëri janë rreth 847 mijë autovetura. Prej tyre, 91% janë mbi 10 vjeç, ndërsa afro 385 mijë automjete janë mbi 20 vjet të vjetra.

Në kontrast të fortë me këtë panoramë, tregu i automjeteve të reja po shënon një orientim gjithnjë e më të madh drejt teknologjive elektrike. Sipas të dhënave të DPSHTRR-së, 71.2% e autoveturave të reja të regjistruara këtë vit janë elektrike, duke shënuar një rritje prej 21% krahasuar me një vit më parë.

Megjithatë, ritmi i regjistrimeve të automjeteve të reja nuk është ende i mjaftueshëm për të ndryshuar në mënyrë të ndjeshme strukturën e përgjithshme të flotës. Pjesa dërrmuese e automjeteve që qarkullojnë në vend vijon të jetë e vjetër, çka sjell pasoja në konsum, siguri dhe ndotje.

Sipas Bankës Botërore, automjetet e vjetra lidhen me konsum më të lartë karburanti, standarde më të ulëta sigurie dhe kosto më të mëdha ekonomike që lidhen me aksidentet, dëmet materiale dhe humbjen e produktivitetit.

Në Bashkimin Europian, automjetet mbi 10 vjeç përbëjnë rreth 57% të flotës, një shifër dukshëm më e ulët se ajo e Shqipërisë.

Raporti thekson gjithashtu se rreth 95% e emetimeve të sektorit të transportit në Shqipëri vijnë nga transporti rrugor. Për këtë arsye, sipas Bankës Botërore, përmirësimi i situatës nuk duhet të mbështetet vetëm te elektrifikimi i automjeteve, por edhe te zhvillimi i transportit publik, hekurudhave dhe infrastrukturës më të sigurt rrugore.