Detaje të reja janë zbardhur nga hetimi për ngjarjen e rëndë në Nea Smyrni të Athinës, ku 48-vjeçari shqiptar Altin Allmuça vrau me armë zjarri 45-vjeçaren Julieta Obzova dhe më pas i dha fund jetës.

Nga verifikimet e autoriteteve greke rezulton se Allmuça ishte i martuar dhe baba i një fëmije. Bashkëshortja e tij është marrë në pyetje nga policia, ndërsa sipas dëshmisë së saj, ajo nuk kishte dijeni për ndonjë marrëdhënie paralele mes bashkëshortit dhe 45-vjeçares.

Në kuadër të hetimeve, policia greke ka kontrolluar banesën e 48-vjeçarit në zonën e Tavrosit, ku janë sekuestruar pajisje elektronike, dokumente dhe telefonat celularë të dy personave. Pajisjet po analizohen nga ekspertët për të zbardhur komunikimet dhe lëvizjet e tyre para ngjarjes.

Hetuesit po fokusohen veçanërisht te aktiviteti online dhe komunikimet e fundit mes dy viktimave, me synim përcaktimin e natyrës së marrëdhënies së tyre dhe nëse ka pasur konflikte apo episode të tjera që mund të kenë paraprirë krimin.

Ndërkohë, nëna e Julieta Obzovës ka dhënë dëshminë e saj për mediat greke, duke rrëfyer mes lotësh momentet kur mori vesh për vdekjen e vajzës. Ajo ka deklaruar se 45-vjeçarja ishte e ndarë prej kohësh nga ish-bashkëshorti dhe se nuk i kishte treguar familjes për ndonjë lidhje të re sentimentale apo probleme që mund ta shqetësonin.

Autoritetet greke vijojnë hetimet për të përcaktuar motivin e saktë të krimit dhe dinamikën e marrëdhënies mes 48-vjeçarit dhe 45-vjeçares. Provat e sekuestruara dhe analizimi i komunikimeve të tyre pritet të ndihmojnë në zbardhjen e plotë të rrethanave që çuan në tragjedinë e Nea Smyrnit.