TIRANË, 23 gusht 2026 – Situata e zjarreve në Shqipëri vijon të mbetet nën monitorim, me 21 vatra të raportuara gjatë 24 orëve të fundit. Sipas Ministrisë së Mbrojtjes, 6 vatra janë ende aktive, ndërsa 7 të tjera po mbahen nën mbikëqyrje.

Për përballimin e situatës janë angazhuar 354 forca operacionale dhe 24 automjete zjarrfikëse, të mbështetura nga 155 efektivë të Forcave të Armatosura, 3 automjete shtesë, një ekskavator i rëndë, si dhe mjete ajrore.

Këto janë zonat ku vijon ndërhyrja Mali i Dajtit: Operacioni vijon me 30 efektivë të Forcave të Armatosura. Sipas autoriteteve, aktualisht nuk ka rrezik për zonat e banuara. Qafë e Helmes, Bulqizë: Zjarri është riaktivizuar në dy vatra në një zonë me pyll me pisha të dendura. Në terren ndodhen 11 efektivë të MZSH-së. Shtuf, Mirditë: Vatra mbetet aktive, por me intensitet të ulët dhe po monitorohet nga strukturat vendore. Shtanë–Tenë, Mirditë: Situata paraqitet e stabilizuar. Ndërhyrja vijon me forca të MZSH-së, shërbimit pyjor dhe bashkisë. Nuk raportohet rrezik për banesat. Prozhem, Pukë: Zjarri vijon në sipërfaqe pyjore. Në operacion janë angazhuar strukturat vendore dhe 30 efektivë të Forcave të Armatosura. Mali i Çikës, mbi Palasë: Zjarri vijon në terren të thepisur dhe të vështirë për t’u aksesuar nga toka. Ndërhyrja po mbështetet edhe nga ajri me 2 avionë Air Tractor.

Operacionet vijojnë në terren

Sipas Ministrisë së Mbrojtjes, në disa zona situata është përmirësuar, ndërsa prioritet mbetet izolimi i vatrave aktive, parandalimi i riaktivizimeve dhe mbrojtja e zonave të banuara.

Vatrat në Gjegjan, Gojan të Vogël dhe Gojan të Madh raportohet se janë izoluar ose shuar dhe aktualisht po mbahen nën mbikëqyrje.

Agjencia Kombëtare e Mbrojtjes Civile vijon koordinimin me prefekturat, bashkitë dhe strukturat e tjera të emergjencave, ndërsa kapacitetet operacionale mbeten në gatishmëri për ndërhyrje të mëtejshme.