VLORË, 22 gusht 2026 – Delegacioni i Global Sumud Flotilla ka mbërritur këtë të shtunë në Portin e Vlorës, pasi kishte njoftuar më herët se do t’i bashkohej protestave dhe kauzës për mbrojtjen e ishullit të Sazanit dhe lumit Vjosa.

Delegacioni është pritur në port nga zëvendësministrja e Kulturës dhe Turizmit, Marinela Prifti, dhe drejtoresha e Përgjithshme e Agjencisë Kombëtare të Turizmit, Jola Hysaj.

Mbërritja e grupit në Vlorë ka sjellë edhe reagimin e kryeministrit Edi Rama, i cili ka ironizuar misionin e Global Sumud Flotilla përmes një postimi në rrjetet sociale.

Rama i ka cilësuar pjesëtarët e delegacionit si “çlirimtarët e Sazanit”, ndërsa ka kritikuar qëndrimet e tyre lidhur me kauzën që kanë deklaruar.

“Ehhhhh… këta revolucionarët e rrenave i ikin të vërtetës si djalli temianit, po ndërkohë çoroditën dynjanë me marrëzitë e tyre. Gjithsesi, një kompliment Agjencisë Kombëtare të Turizmit dhe Ministrisë së Kulturës e Turizmit për ‘pritjen’ e bukur që u bënë çlirimtarëve të Sazanit”, shkruan Rama.

Vizita e delegacionit vjen në një kohë kur çështja e zhvillimeve dhe mbrojtjes së zonave natyrore të Sazanit dhe Vjosës ka nxitur reagime dhe protesta publike.