Gjykata e Durrësit ka caktuar masën e sigurisë "Arrest me burg" për 26-vjeçarin Aldi Talelli, i cili u arrestua pak ditë më parë pas një aksidenti tragjik që i mori jetën një të moshuari më 19 gusht. Gjykata çmoi se Talelli duhet të qëndrojë në masën e sigurisë burg pa afat deri në përfundim të hetimeve.

Ngjarja ndodhi teksa 26-vjeçari kishte ndaluar me mjetin e tij taksi. Makina ka marrë gaz papritur dhe është futur në trotuar, duke përplasur rëndë 66-vjeçarin Fezi Dine, i cili po ecte pranë një ndërtese.

Dyshohet se aksidenti që i mori jetën qytetarit ndodhi nga pakujdesia.

Fezi Dine po ecte në trotuar kur taksia e përplasi në murin e një ndërtese duke e dëmtuar rëndë në gjymtyrët e poshtme.

Pavarësisht dërgimit me urgjencë në spital, i moshuari ndërroi jetë si pasojë e dëmtimeve të rënda.

Sipas hetimeve paraprake, aksidenti dyshohet se ka ndodhur nga pakujdesia. I riu akuzohet për veprën penale “Shkelja e rregullave të qarkullimit rrugor” me pasojë vdekjen, (neni 290/3 i Kodit Penal), e cila parashikon dënim nga 2 deri në 10 vjet burgim.

Sipas kësaj dispozite, shkelja e rregullave të qarkullimit rrugor, kur ka shkaktuar vdekjen e një personi, dënohet me burgim nga dy deri në dhjetë vjet.

Nga verifikimet e policisë rezultoi se taksisti kishte të gjithë dokumentacionin e nevojshëm ligjor dhe nuk ndodhej nën efektin e alkoolit apo lëndëve narkotike.