Kryetari i Partisë Demokratike, Sali Berisha, gjatë një bashkëbisedimi me qytetarët në rrjetet sociale, ka deklaruar se mbledhja e ardhshme e Këshillit Kombëtar këtë të enjte do të përbëjë një moment mjaft të rëndësishëm për përcaktimin e veprimtarisë dhe qëndrimeve të mëtejshme të forcës politike që ai drejton.

Sipas Berishës, ndryshimi i nevojshëm brenda partisë do të ketë në epiqendër anëtarin e thjeshtë. Ai nëvizoi se pas ripërtëritjes së gjithanshme të mekuadrit drejtues në Kuvendin e PD-së, hapi i radhës është modernizimi, rritja e hapësirave për kontribut dhe përcjellja e këtij procesi ripërtëritës në çdo nivel të strukturave organizative.

"Ajo që duhet të shtoj me këtë rast është një domosdoshmëri absolute për një ndryshim të madh të PD-së. Dhe ky ndryshim do ketë në epiqendër anëtarin e saj. Dita e enjte është një ditë e rëndësishme për partinë. Mblidhet Këshilli Kombëtar, pikërisht për të caktuar veprimtarinë dhe qëndrimet e mëtejshme të PD në përputhje me direktivat e Kuvendit të saj. Kuvendi i saj, siç e dini, dha disa mesazhe shumë të rëndësishme. Mesazhe konkrete në ripërtëritje. Dhe e vërteta është se pavarësisht se çfarë komentojnë, por strukturat drejtuese të kësaj partie u ripërtërinë më shumë se kurrë në historinë e saj. Duhet të pranojmë se kjo ripërtëritje është vetëm një hap, pozitiv pa diskutim, por hapi tjetër është që potencialet e këtij ndryshimi, i këtyre individëve, i këtyre drejtuesve të shndërrohen në vlera për PD. Dhe këto shndërrohen në vlera vetëm në saj të veprimit të secilit prej tyre. Dhe në këtë kontekst, u siguroj se i gjithë përqendrimi i kësaj force politike do jetë tek anëtari i thjeshtë. Si të komunikohet më shumë dhe më mirë me të. Si të zgjerohet hapësira e tij për kontributin e tij. Si të ripërtërihemi. Në qoftë se u ripërtërinë forumet, kjo duhet të përcillet në të gjitha nivelet. Ripërtëritja duhet parë si një kusht i ekzistencës tonë. U siguroj se gjatë kësaj vere të nxehtë nonstop janë bërë parapërgatitje për të kaluar në këtë fazë që është komunikimi, modernizimi, organizimi i ri i PD-së," tha Berisha.