Ditët e fundit të gushtit kanë sjellë një fluks të jashtëzakonshëm pushuesish nga Kosova drejt bregdetit shqiptar. Ndryshe nga ditët e zakonshme, dyndja e automjeteve dhe udhëtarëve ka nisur që në orët e para të mëngjesit të së shtunës në pikën kufitare të Morinës.

Sipas të dhënave zyrtare nga Stacioni i Policisë Kufitare Morinë/Kukës, vetëm në harkun kohor prej pesë orësh (nga ora 05:00 deri në 10:00), në territorin e Shqipërisë kanë hyrë 24,408 shtetas të Kosovës. Për transportimin e tyre janë regjistruar 8,592 mjete të vogla dhe autobusë.

Autoritetet presin që ky fluks i lartë lëvizjeje të vijojë gjatë gjithë fundjavës, ndërsa bregdeti shqiptar mbetet destinacioni kryesor për qytetarët nga Kosova që kërkojnë të kalojnë ditët e fundit të sezonit veror.