Një sasi lënde plasëse ka shpërthyer gjatë orëve të para të mëngjesit në fshatin Laknas të Kamzës, duke dëmtuar një automjet të parkuar në oborrin e një banese.

Sipas njoftimit të Policisë së Shtetit, rreth orës 03:00, shtetasi Ylli Troçi, 41 vjeç, ka njoftuar sallën operative se ka dëgjuar një zhurmë në rrugën “Lunxhëria”.

Nga verifikimet e kryera pas shpërthimit, automjeti i tij ka pësuar dëmtime të lehta materiale në pjesën e pasqyrës dhe te dera e drejtuesit.

Policia tha se një person ende i paidentifikuar ka hedhur lëndën plasëse në drejtim të mjetit.

Grupi hetimor, në bashkëpunim me Prokurorinë, po vijon punën për sqarimin e plotë të rrethanave, si dhe për identifikimin dhe kapjen e autorit apo autorëve të kësaj ngjarjeje.

Njoftimi i policisë

Kamëz/ Rreth orës 03:00, shtetasi Y. T., rreth 41 vjeç, ka njoftuar Sallën Operative se, në Laknas, në rrugën “Lunxheria”, ka dëgjuar një zhurmë dhe më pas ka konstatuar se automjeti i tij, i cili ishte i parkuar në oborrin e banesës, kishte pësuar dëmtime të lehta në pasqyrë dhe në derën e drejtuesit të automjetit.

Paraprakisht rezulton se një shtetas, ende i paidentifikuar, ka hedhur në drejtim të automjetit, dyshohet, një sasi të vogël lënde plasëse, duke shkaktuar dëme të vogla materiale.

Grupi hetimor, në bashkëpunim me Prokurorinë, po punon për sqarimin e rrethanave të rastit, identifikimin dhe kapjen e autorit/autorëve.