Kryetari i Partisë Demokratike, Sali Berisha, u ka bërë thirrje të gjithë mbështetësve demokratë në Tiranë dhe në mbarë vendin që ta shndërrojnë muajin shtator në një pikë kthimi përmes protestave popullore, me qëllim rrëzimin e asaj që ai e cilësoi si "narkoregjim" të kryeministrit Edi Rama.

Përmes një deklarate për mediat, Berisha vlerësoi qëndresën e protestuesve që vazhdojnë tubimet prej më shumë se 80 ditësh, duke e konsideruar sakrificën e tyre si një frymëzim për të gjithë qytetarët. Kreu i PD-së theksoi se synimi kryesor i këtij aksioni opozitar është shkëputja nga diktatura dhe garantimi i zgjedhjeve të lira e të ndershme, sipas tij, për t’ju përafruar standardeve zgjedhore që zbaton Kosova.