Një ngjarje e rëndë ka ndodhur në aeroportin e Antalias, në Turqi, ku një ish-polic dyshohet se ka vrarë me armë partneren e tij.

Sipas mediave turke, Hüseyin Durmaz, 51 vjeç, qëlloi me armë partneren e tij, Elina Şengün, 38 vjeç, me origjinë nga Gjeorgjia. Gruaja u dërgua me urgjencë në spital, por nuk mundi t’u mbijetonte plagëve të marra.

Şengün, nënë e dy fëmijëve, punonte si konsulente shitjesh në aeroport. Sipas raportimeve, ajo kishte qenë në një lidhje prej rreth dy vitesh me Durmazin, i cili dyshohet se e kishte kërcënuar vazhdimisht.

Ngjarja ndodhi pasi ish-polici nuk e kishte gjetur partneren në banesë. Ai dyshohet se shkoi në aeroport dhe, pasi e pa, e qëlloi me armën e shërbimit.

Durmaz është arrestuar nga policia dhe është shoqëruar në komisariat, ndërsa hetimet vijojnë për zbardhjen e plotë të rrethanave dhe motivit të krimit.