Principote Mykonos ka reaguar pas vrasjes së 20-vjeçarit portugez Luis Miguel Varela Mendes në Ksamil, duke mohuar çdo lidhje me beach-barin “Principotes” në Shqipëri. Biznesi grek pretendon se emri i markës së tij është përdorur në mënyrë të paligjshme dhe thotë se ka ndërmarrë veprime ligjore.

Principote Mykonos në Greqi ka reaguar pas ngjarjes së rëndë të ndodhur në Ksamil, ku 20-vjeçari portugez Luis Miguel Varela Mendes humbi jetën pas një konflikti. Për ngjarjen është arrestuar 29-vjeçari shqiptar Sokrat Vata.

Përmes një deklarate, Principote Mykonos ka sqaruar se nuk ka asnjë marrëdhënie biznesi apo lidhje tjetër me beach-barin në Ksamil, ku ndodhi incidenti.

Sipas biznesit grek, subjekti në Ksamil po përdor në mënyrë të paligjshme emrin e markës “Principote”. Principote Mykonos bën të ditur gjithashtu se ka ndërmarrë veprime ligjore ndaj subjektit shqiptar, me qëllim ndalimin e përdorimit të emrit dhe markës së tij.

Në deklaratë thuhet:

“Në dritën e një incidenti tragjik që ndodhi së fundmi në qytetin shqiptar të Ksamilit dhe në një dyqan që po përdor ilegalisht emrin tonë të biznesit, sqarojmë, për të shmangur konfuzionin, se PRINCIPOTE MYKONOS nuk ka absolutisht asnjë marrëdhënie biznesi apo tjetër me lokalin e mësipërm shqiptar, i cili po përdor ilegalisht emrin tonë dhe kundër të cilit kemi ndërmarrë veprime ligjore, me qëllim që ta ndalojmë atë të përfshihet në konkurrencë të padrejtë në dëmin tonë, duke ‘korrur’ ilegalisht reputacionin ndërkombëtar që PRINCIPOTE MYKONOS ka fituar gjatë shumë viteve të ofrimit të shërbimeve të nivelit më të lartë”, thuhet në deklaratën e Principote Mykonos.

Biznesi grek thekson kështu se nuk ka asnjë lidhje me subjektin në Ksamil dhe se përdorimi i emrit “Principote” nga ky i fundit është bërë pa autorizim.

Reagimi vjen ndërsa autoritetet shqiptare vijojnë hetimet për konfliktin e dhunshëm në Ksamil, ku 20-vjeçari portugez Luis Miguel Varela Mendes humbi jetën.

Ngjarja e rëndë ndodhi pas një konflikti në ambientet e beach-barit në Ksamil, ndërsa hetimet vijojnë për zbardhjen e plotë të rrethanave të saj.