Një zjarr i përmasave të mëdha ka përfshirë një zonë në Rrëshen këtë të premte, duke rrezikuar banesat dhe duke detyruar autoritetet të nisin evakuimin e banorëve.

Deri më tani, katër familje janë evakuuar nga zona e rrezikuar, ndërsa situata mbetet dinamike dhe nuk përjashtohet mundësia e largimit të familjeve të tjera nëse flakët vijojnë të përhapen.

Ndërhyrja e shërbimeve zjarrfikëse është vështirësuar për shkak të terrenit dhe pozicionimit të flakëve. Sipas të dhënave paraprake, zjarri ka bllokuar një prej lagjeve, duke penguar lëvizjen e mjeteve zjarrfikëse dhe duke e bërë më të vështirë operacionin për shuarjen e tij.

Forcat zjarrfikëse ndodhen në terren dhe po punojnë për izolimin e vatrës, ndërsa autoritetet po monitorojnë situatën për të garantuar sigurinë e banorëve.

Deri në këto momente nuk raportohet për persona të lënduar, ndërsa mbetet për t’u përcaktuar shkaku i rënies së zjarrit dhe sipërfaqja e përfshirë nga flakët.