Sokrat Vata, i dyshuari kryesor për vrasjen e turistit 20-vjeçar portugez, ka mbërritur në Gjykatën e Sarandës nën masa të rrepta sigurie, ku pritet të njihet me masën e sigurisë. Ngjarja e rëndë ndodhi gjatë një konflikti në ambientet pranë kompleksit “Principotes” në Ksamil, ku Vata dyshohet se qëlloi me thikë viktimën, duke i shkaktuar plagë fatale.

Në momentin e mbërritjes së tij në ambientet e gjykatës, të afërmit e 29-vjeçarit kanë qenë të pranishëm për t’i dhënë kurajë, duke iu drejtuar me thirrjen: “Sokrat, jemi këtu o shpirt”.

Gjatë dëshmisë së tij para grupit hetimor, Vata ka pretenduar se konflikti kishte nisur mes turistëve dhe se arma e ftohtë e përdorur në përplasje i përkiste vetë viktimës. Përveç tij, në lidhje me ngjarjen janë arrestuar edhe persona të tjerë, ndërsa tashmë pritet vendimi përfundimtar i gjykatës për caktimin e masës së sigurisë.