PRISHTINË — Kryetari i Organizatës së Veteranëve të Luftës së UÇK-së (OVL-UÇK), Hysni Gucati, ka drejtuar kritika të ashpra ndaj Qeverisë Kurti, duke denoncuar mungesën e plotë të bashkëpunimit dhe mosrealizimin e asnjë kërkese të veteranëve gjatë gjashtë viteve të fundit.

Gjatë deklaratave të bëra pas nënshkrimit të një memorandumi bashkëpunimi me Odën e Hotelierisë dhe Turizmit të Kosovës (OHTK), Gucati theksoi se organizata nuk ka pasur asnjë takim apo diskutim me qeverinë në detyrë. Ai ngriti shqetësimin madhor për gjendjen e rëndë shëndetësore të veteranëve, duke bërë me dije se 67 prej tyre janë prekur nga kanceri, ku 24 prej tyre po trajtohen urgjentisht në Turqi, ndërsa të tjerë marrin trajtim mjekësor në Kosovë dhe vendet e Evropës. Sipas tij, institucionet e vendit kanë një detyrim ligjor dhe moral për të garantuar kujdesin e merituar për kategoritë e dala nga lufta.

Nga ana e tij, kryetari i OHTK-së, Hysen Sogojeva, shpjegoi se memorandumi i ri synon t’i japë mbështetje konkrete veteranëve, përfshirë akomodimin e delegacioneve dhe ndihmën në organizimin e aktiviteteve të ndryshme në mbarë vendin.