TIRANË — Gjykata e Posaçme Kundër Korrupsionit dhe Krimit të Organizuar (GJKKO) ka vendosur zbutjen e masës së sigurisë për ish-kreun e Autoritetit Rrugor Shqiptar (ARRSH), Gentian Gjyli, dhe ish-administratorin e Korporatës Elektroenergjetike Shqiptare (KESH), Erald Elezi.

Të dy ish-zyrtarët, të cilët ishin nën masën “arrest në shtëpi”, tashmë do të hetohen në liri pasi Gjykata ka vendosur ndryshimin e masës në “detyrim për paraqitje” dhe “ndalim për të dalë jashtë vendit”.

Gjyli dhe Elezi janë të pandehur në kuadër të hetimeve për abuzime me procedurat e tenderit për ndërtimin e tunelit të Llogarasë. Ndërkohë, Erald Elezi përballet me akuza edhe për një lot të Unazës së Madhe të Tiranës. Çështja lidhet me hetimet më të gjera që përfshijnë edhe ish-zëvendëskryeministren dhe ish-ministren e Infrastrukturës dhe Energjisë, Belinda Balluku, e cila po hetohet për korrupsion dhe pastrim parash lidhur me tenderin e Llogarasë dhe lotet e Unazës së Madhe.