IMPERIA, ITALI — Një histori e rrallë angazhimi qytetar vjen nga komuniteti i vogël malor i Triora-s në provincën e Imperias, ku kryebashkiaku Massimo Di Fazio ka refuzuar të marrë pagën e tij mujore për një periudhë prej tetë vitesh. Sipas llogaritjeve, shuma totale nga e cila ai ka hequr dorë që nga viti 2018 arrin në rreth 160 mijë euro.

Triora, një zonë me rreth 390 banorë, por me një territor të gjerë që përfshin 11 fshatra, përballet vazhdimisht me sfida të mëdha infrastrukturore, mungesë të burimeve njerëzore dhe staf administrativ prej vetëm tre punonjësish. Duke shpjeguar arsyet e këtij vendimi, Di Fazio është shprehur se gjithçka bëhet "për dashuri" dhe se drejtimi i bashkisë për të është mbi të gjitha një mision shërbimi ndaj komunitetit.

Gjatë viteve të udhëheqjes së tij, pavarësisht vështirësive financiare dhe mbështetjes në punën vullnetare të banorëve, bashkia ka arritur të sigurojë rreth 20 milionë euro financime për investime publike, sigurinë e territorit dhe turizmin. Megjithëse ai pati kërkuar një rritje të pagës për ta rikthyer më pas sërish në arkën e bashkisë, kërkesa u rrëzua nga Gjykata e Llogarive, duke e lënë atë të vijojë angazhimin e tij pa shpërblim financiar në të mirë të qytetarëve.