TIRANË — Ministria për Evropën dhe Punët e Jashtme (MEPJ) ka shprehur keqardhje zyrtare lidhur me mospërfshirjen e Himnit Kombëtar Shqiptar gjatë një aktiviteti kulturor të zhvilluar një ditë më parë në Pustec, ku ishin të pranishëm kryeministri i Maqedonisë së Veriut dhe drejtues të tjerë vendorë.

Në reagimin e saj, MEPJ thekson se pavarësisht se organizimi ishte ndërmarrë nga një shoqatë lokale, prania e përfaqësuesve të lartë institucionalë i jepte ngjarjes një dimension të veçantë publik. Sipas ministrisë, mospërfshirja e himnit shqiptar krahas atij maqedonas përbën një shmangie nga rregullat e etikës institucionale dhe të protokollit, të kërkuara në raste të tilla.

Institucioni i diplomacisë shqiptare nënvizon se respekti për simbolet kombëtare nuk duhet të jetë çështje politike apo interpretimi, por pjesë e bashkëjetesës demokratike dhe e kulturës qytetare. Në njoftim theksohet gjithashtu se respektimi i ndërsjellë i simboleve përbën themelin e fqinjësisë së mirë dhe të marrëdhënieve të shëndosha ndërmjet dy shteteve dhe qytetarëve të tyre.