Vasil Hasani po lëvizte me biçikletë kur u përplas për vdekje në aksin Shkozet-Shijak. Drejtuesi i automjetit u largua nga vendngjarja dhe po kërkohet nga policia

DURRËS – Është identifikuar 32-vjeçari që humbi jetën mëngjesin e sotëm në aksidentin e rëndë të ndodhur në aksin rrugor “Shkozet-Shijak”, në zonën e Rrashbullit.

Viktima është Vasil Hasani, i cili po lëvizte me biçikletë kur u përplas nga një automjet ende i paidentifikuar.

Ngjarja ndodhi rreth orës 06:15. Përplasja rezultoi fatale për 32-vjeçarin, i cili ndërroi jetë në vendngjarje.

Pas aksidentit, drejtuesi i automjetit nuk ka ndaluar, por është larguar nga vendi i ngjarjes.

Policia po punon për identifikimin dhe kapjen e shoferit, ndërsa po verifikohen edhe pamjet e kamerave të sigurisë dhe të dhëna të tjera që mund të ndihmojnë në përcaktimin e automjetit të përfshirë.

Grupi hetimor, nën drejtimin e Prokurorisë, vijon punën për zbardhjen e plotë të rrethanave dhe shkakut të aksidentit. /noa.al