WASHINGTON — Administrata e Shteteve të Bashkuara të Amerikës ka njoftuar Kongresin se do të ndajë mbi 206 milionë dollarë në mbështetje të Forcës Ndërkombëtare Stabilizuese në Rripin e Gazës (ISF), ku pjesë e kontributit do të jenë edhe automjete të blinduara për Shqipërinë dhe Kosovën.

Sipas raportimeve të agjencisë Reuters, pjesa më e madhe e fondeve, prej 200 milionë dollarësh, do të orientohet drejt pajisjeve, infrastrukturës dhe operacioneve të ISF-së, ndërsa rreth 6.3 milionë dollarë të tjera do të përdoren për automjete të blinduara që fillimisht ishin destinuar për Nepalin. Në një njoftim zyrtar të Departamentit të Shtetit të datës 30 korrik, bëhet e ditur se Shqipëria dhe Kosova do të jenë përfitueset e nëntë transportuesve të blinduar të personelit (APC), në kuadër të mbështetjes për trupat e tyre që shërbejnë në misionin e paqes.

Deri më tani, pesë shtete janë angazhuar zyrtarisht në Forcën Ndërkombëtare Stabilizuese — Shqipëria, Kosova, Indonesia, Maroku dhe Kazakistani. Këto trupa pritet të udhëheqin operacionet e sigurisë në enklavë, të mbështesin procesin e demilitarizimit, të garantojnë shpërndarjen e sigurt të ndihmave humanitare dhe të ndihmojnë në çarmatimin e Hamasit pas tërheqjes së forcave izraelite.