Dinamo City ka mbyllur në barazim 1-1 ndeshjen e parë të play-off-it të Conference League ndaj Pafos, në “Elbasan Arena”.

Blutë kaluan në avantazh në minutën e 78-të. Pas një kundërsulmi të shpejtë, Fadairo u shfaq në krahun e djathtë dhe dërgoi topin në rrjetë, duke ndezur stadiumin.

Avantazhi i Dinamos zgjati vetëm pesë minuta. Në minutën e 83-të, Pafos fitoi një tjetër penallti, pas ndërhyrjes së Vilës ndaj Rodrigues. Lele u tregua i saktë nga pika e bardhë dhe vendosi shifrat 1-1.

Qipriotët kishin pasur mundësinë të shënonin edhe më herët, por në minutën e 38-të David Luiz humbi penalltinë, duke e dërguar topin jashtë.

Në minutat e fundit, Pafos ishte pranë golit të fitores, por një goditje përfundoi në shtyllë.

Kështu, Dinamo City dhe Pafos ndajnë nga një gol dhe gjithçka mbetet e hapur për ndeshjen e kthimit në Qipro, ku do të vendoset skuadra që do të avancojë më tej në Conference League.