SHBA, 20 gusht 2026 – Administrata amerikane po përpiqet të dëbojë nga Shtetet e Bashkuara Blerim Skoron, 55-vjeçarin me origjinë nga Kosova, i cili pretendon se ka bashkëpunuar në fshehtësi me inteligjencën amerikane dhe është infiltruar në rrjete terroriste pas sulmeve të 11 shtatorit 2001.

Sipas raportimeve të ABC News, Skoro u arrestua nga agjentët e Emigracionit dhe Doganave (ICE) jashtë një zyre emigracioni në Nju Xhersi, ku ishte paraqitur për rinovimin e dokumenteve. Pas ndalimit, avokatët e tij iu drejtuan gjykatës federale me kërkesë urgjente për të bllokuar dëbimin.

Pretendon se ka punuar për inteligjencën amerikane

Sipas dokumenteve gjyqësore dhe materialeve të FBI-së të cituara në raportime, bashkëpunimi i Skoros me autoritetet amerikane nisi gjatë kohës kur ai vuante një dënim për trafik droge në vitin 2000.

Pas sulmeve të 11 shtatorit, ai pretendon se u rekrutua nga shërbimet amerikane për të mbledhur informacione mbi organizata ekstremiste islamike. Sipas deklarimeve të tij, informacionet e siguruara prej tij ndihmuan në operacione kundër elementëve të Al-Kaedës, Al-Shabaab dhe Hezbollahut, si dhe në parandalimin e një komploti që përfshinte një të ashtuquajtur “bombë të ndyrë” me uranium në Kosovë.

Nga viti 2007 deri në vitin 2009, sipas rrëfimit të tij, ai kreu misione jashtë SHBA-së dhe udhëtoi në zona ku ndodheshin kampe trajnimi në Siri, Liban, Jordani dhe Pakistan.

U plagos gjatë një atentati

Skoro pretendon se identiteti i tij si bashkëpunëtor i inteligjencës amerikane u zbulua dhe se më pas u përball me një atentat, ku u plagos me armë zjarri në këmbë. Ai u rikthye në Shtetet e Bashkuara në vitin 2014.

Historia e tij është trajtuar edhe në dokumentarin e vitit 2024 “The Accidental Spy”, si dhe në një intervistë për Shawn Ryan Show.

Në vitin 2022 mori mbrojtje nga deportimi

Një element kyç i çështjes është vendimi i një gjykatësi federal në vitin 2022, i cili i dha Skoros mbrojtje nga dëbimi në bazë të Konventës Kundër Torturës. Vendimi lidhej me pretendimin se ai mund të përballej me rrezik serioz për jetën nëse kthehej në Kosovë, për shkak të lidhjeve të tij të pretenduara me rrjetet terroriste.

Pavarësisht kësaj, ICE e ndaloi sërish Skoron, ndërsa avokatët e tij pretendojnë se dëbimi nuk mund të kryhet pa ndërhyrjen dhe shqyrtimin e gjykatës.

Nga qendra e paraburgimit, 55-vjeçari e ka cilësuar situatën si një “tradhti” nga shteti amerikan, ndërsa mbrojtja e tij ligjore kërkon pezullimin urgjent të çdo procedure për transferimin ose dëbimin e tij.