Shkodër, 20 gusht 2026 – Është vetëdorëzuar në Policinë e Shkodrës Pjerin Bitani, i dyshuar për plagosjen me armë zjarri të Vladimir Bruçit, ngjarje e ndodhur pasditen e sotme në Shkodër.

Ngjarja u regjistrua rreth orës 14:30, ndërsa dorëzimi i të dyshuarit erdhi pas negociatave të zhvilluara mes efektivëve të Policisë dhe familjarëve të tij.

Konflikti dyshohet se nisi për kamerat e sigurisë

Sipas burimeve nga grupi hetimor, ngjarja dyshohet se ka nisur pas një debati mes dy personave, të cilët prej vitesh kishin marrëdhënie miqësore.

Shkak i konfliktit dyshohet të jenë bërë kamerat e sigurisë të lokalit në pronësi të Bitanit. Bruçi i kishte kërkuar fqinjit të tij heqjen e kamerave, me pretendimin se banonte pranë lokalit dhe kalonte çdo ditë në atë zonë.

Refuzimi i kërkesës dyshohet se ka përshkallëzuar debatin verbal, i cili më pas ka përfunduar me përdorimin e armës së zjarrit.

Si pasojë, Vladimir Bruçi mbeti i plagosur dhe u transportua me urgjencë në Spitalin Rajonal të Shkodrës. Sipas informacioneve paraprake, ai ndodhet nën kujdesin e mjekëve dhe është jashtë rrezikut për jetën.

Pas vetëdorëzimit të Pjerin Bitanit, Policia ka vijuar veprimet procedurale dhe hetimet për dokumentimin e plotë të ngjarjes, përcaktimin e përgjegjësive dhe zbardhjen e të gjitha rrethanave të konfliktit.

Shkodër

Plagosi me armë zjarri fqinjin e tij, për motive të dobëta; pas kontrolleve të shumta, pamundësisë për t’u larguar dhe negociatave mes familjarëve dhe Policisë, vetëdorëzohet autori i dyshuar i plagosjes me armë zjarri të komshiut të tij.

70-vjeçari u arrestua për “Vrasja me dashje”, mbetur në tentativë, dhe “Mbajtja pa leje dhe prodhimi i armëve, armëve shpërthyese dhe i municionit”.

Si rezultat i kontrolleve të shumta të kryera nga shërbimet e Policisë, pamundësisë për t’u larguar dhe për të qëndruar i fshehur, si dhe negociatave të vazhdueshme mes familjarëve të autorit të dyshuar dhe Policisë, shtetasi P. B. u vetëdorëzua te strukturat e Policisë, në lagjen “Rus”, ku qëndronte i fshehur prej disa orësh.

Në përfundim të veprimeve procedurale, 70-vjeçari u arrestua për veprat penale “Vrasja me dashje”, mbetur në tentativë, dhe “Mbajtja pa leje dhe prodhimi i armëve, armëve shpërthyese dhe i municionit”, pasi:

Rreth orës 14:30 të ditës së sotme, në lagjen “Partizani”, dyshohet se shtetasi P. B., 70 vjeç, për motive të dobëta, ka plagosur me armë zjarri fqinjin e tij, shtetasin V. B., 64 vjeç, i cili ndodhet në Spitalin Rajonal Shkodër, jashtë rrezikut për jetën.

Materialet procedurale i kaluan Prokurorisë së Shkodrës, për veprime të mëtejshme.