Krujë, 20 gusht 2026 – Një vatër zjarri me përmasa të mëdha ka përfshirë zonën e Bilajt në Krujë, duke djegur disa hektarë tokë djerrë dhe sipërfaqe të konsiderueshme me pemëtari.

Era e fortë ka favorizuar përhapjen e shpejtë të flakëve, të cilat janë afruar pranë autostradës Thumanë-Kashar.

Tymi vështirëson qarkullimin

Re të dendura tymi kanë mbuluar pjesë të autostradës, duke reduktuar ndjeshëm fushëpamjen dhe duke vështirësuar qarkullimin e automjeteve në këtë aks të rëndësishëm rrugor.

Në vendngjarje kanë mbërritur forcat zjarrfikëse, të cilat po punojnë për lokalizimin dhe shuarjen e vatrave të zjarrit. Sipas të dhënave paraprake, zjarri është përhapur në disa pika, duke e komplikuar ndërhyrjen.

Ekipet zjarrfikëse po punojnë për të mbajtur flakët larg banesave dhe për të parandaluar përhapjen e mëtejshme drejt autostradës dhe zonave përreth.

Shkaqet e rënies së zjarrit nuk janë bërë ende të ditura, ndërsa situata vijon të monitorohet nga autoritetet.