Milot, 20 gusht 2026 – Një zjarr i përmasave të konsiderueshme ka përfshirë një masiv pyjor mbi qytetin e Milotit, në territorin e Bashkisë Kurbin, duke krijuar shqetësim për banorët e zonës.

Flakët janë përhapur me shpejtësi, të favorizuara nga temperaturat e larta dhe erërat e forta, ndërsa perimetri i zjarrit është zgjeruar dhe është afruar pranë zonave të banuara.

Në terren kanë mbërritur forcat zjarrfikëse të Bashkisë Kurbin, të mbështetura nga ekipet e Lezhës dhe Kamzës, të cilat po punojnë për izolimin dhe shuarjen e flakëve.

Nis ndërhyrja nga ajri

Për shkak të përhapjes së zjarrit dhe terrenit të vështirë, në operacion është përfshirë edhe ndërhyrja nga ajri.

Prefekti i Lezhës, Taulant Malshi, i cili ndodhet në vendngjarje, ka bërë me dije se operacioni ajror ka nisur për të ndihmuar në neutralizimin e vatrave të zjarrit.

Terreni i vështirë dhe bimësia e dendur po e komplikojnë ndërhyrjen e forcave në tokë, ndërsa kushtet atmosferike favorizojnë përhapjen e mëtejshme të flakëve.

Forcat në terren vijojnë punën për të mbajtur zjarrin larg banesave dhe për të vënë nën kontroll situatën.