Poliçan, 20 gusht 2026 – Debati për Reformën Administrativo-Territoriale ka marrë një zhvillim të ri në Poliçan, pas propozimit për shkrirjen e Bashkisë dhe bashkimin e saj me Bashkinë e Beratit.

Këshilli Bashkiak i Poliçanit ka thirrur një mbledhje jashtë radhe ditën e premte, 21 gusht, në orën 10:00, në sallën e Këshillit Bashkiak, ku pritet të miratojë qëndrimin institucional të këtij organi ndaj propozimit për riorganizimin territorial.

Sipas njoftimit zyrtar, në rendin e ditës është përfshirë pika: “Për shprehjen e mendimit dhe të qëndrimit institucional të Këshillit Bashkiak Poliçan, mbi propozimin për shkrirjen e Bashkisë Poliçan dhe bashkimin me Bashkinë Berat, në kuadër të Reformës Administrativo-Territoriale.”

Mbledhja është thirrur në mbështetje të nenit 53, pikat 2 dhe 4, të Ligjit nr. 139/2015 “Për vetëqeverisjen vendore”. Njoftimi mban firmat e kryetares së Këshillit Bashkiak, Mimoza Lulaj, dhe sekretares Lindita Kondi.

Përplasja politike

Propozimi për ndryshimin e statusit të Poliçanit ka shkaktuar reagime të forta në strukturat lokale të Partisë Socialiste. Mbështetës dhe përfaqësues vendorë kanë shprehur kundërshtimin ndaj përfshirjes së Poliçanit në një njësi të përbashkët me Beratin.

Në kuadër të protestave kundër reformës, disa mbështetës të PS-së në Poliçan kanë djegur publikisht teserat e partisë, në shenjë kundërshtimi ndaj vendimit të propozuar.

Debati është shoqëruar edhe me përplasje politike mes kryeministrit Edi Rama dhe kryebashkiakut të Poliçanit, Adriatik Zotkaj.

Gjatë një takimi me dyer të mbyllura në Kuç të Vlorës, ku është diskutuar reforma territoriale, Rama dhe Zotkaj janë përplasur për çështjen e Poliçanit. Sipas raportimeve, Rama e ka kritikuar Zotkajn për pjesëmarrjen në protestat kundër reformës dhe djegien e teserës së PS-së, ndërsa kryebashkiaku i është kundërpërgjigjur duke kundërshtuar shkrirjen e bashkisë.

Zhvillimi i radhës pritet të jetë mbledhja e Këshillit Bashkiak më 21 gusht, ku qëndrimi i Poliçanit do të marrë formë zyrtare.

Nëse Këshilli Bashkiak miraton një qëndrim kundër propozimit, Poliçani do t’i shtohet zyrtarisht zërave vendorë që kundërshtojnë riorganizimin e propozuar të hartës administrative.