Një 45-vjeçar shqiptar është shpallur në kërkim nga karabinierët në Itali, pasi dyshohet se pas një konflikti të ashpër me gruan e tij ka drejtuar makinën drejt ujërave të portit të Cattolica-s, duke rrezikuar jetën e të dyve.

Ngjarja ndodhi të mërkurën rreth orës 16:00. Sipas raportimeve, çifti ndodhej në një Volkswagen Golf kur, pas debatit, burri e drejtoi automjetin me shpejtësi drejt kalatës dhe u zhyt në det.

Makina nisi të fundosej, por dyert u hapën dhe të dy arritën të dilnin nga automjeti. Disa persona që ndodheshin pranë portit ndërhynë për t’i ndihmuar, ndërsa në vendngjarje mbërritën ambulanca, zjarrfikësit, karabinierët dhe Kapiteneria e Portit.

Gruaja, një 40-vjeçare italiane, u dërgua në spital dhe ndodhet jashtë rrezikut për jetën.

Ndërkohë, 45-vjeçari shqiptar, pasi mori ndihmën e parë, u largua mes shkëmbinjve dhe humbi gjurmët, duke u shpallur në kërkim.

Sipas autoriteteve, ai ishte arrestuar edhe një ditë më parë për rezistencë ndaj policisë, pas një tjetër konflikti me bashkëshorten.

Hetimet vijojnë, ndërsa autoritetet po punojnë edhe për nxjerrjen e automjetit nga ujërat e portit. (Rimini Today)