Gjykata Penale e Tiranës ka caktuar masën e sigurisë “arrest në burg” për Argys Kalsin, 35 vjeç, i dyshuar si një prej autorëve të grabitjes së një argjendarie në Paskuqan, ngjarje e ndodhur më 5 gusht.

Kalsi u arrestua dy ditë më parë në pikën kufitare të Qafë Thanës, teksa dyshohet se tentonte të largohej nga Shqipëria drejt Maqedonisë së Veriut. Sipas policisë, 35-vjeçari ishte mbajtur prej disa ditësh nën vëzhgim dhe përgjim, në kuadër të hetimeve për identifikimin e autorëve të grabitjes.

Gjatë seancës gjyqësore, Kalsi ka mohuar përfshirjen në ngjarje, ndërsa nuk ka bashkëpunuar me autoritetet për identifikimin e personit tjetër të dyshuar si bashkëpunëtor.

Sipas hetimeve, arrestimi i tij u bë pasi në disa sende të gjetura dhe sekuestruara nga policia në një zonë të pyllëzuar në Zall-Herr u identifikuan gjurmë papilare. Pas ndalimit, atij iu mor edhe një mostër për profilizim ADN-je.

Profili gjenetik i 35-vjeçarit rezultoi në përputhje me gjurmët e gjetura në një prej maskave prej silikoni të përdorura gjatë grabitjes, duke përforcuar dyshimet e hetuesve për përfshirjen e tij në ngjarje. Ndërkohë, hetimet vijojnë për identifikimin dhe kapjen e personit tjetër të dyshuar.